| Publikuar më: 2017-07-21 | Radio Peja | Shtype |

Komuna e Pejës tani për tani me disa përjashtime të vogla ka furnizim të rregullt me ujë të pijshëm gjatë 24 orëve, ka thënë në një intervistë ekskluzive për Radio Pejën drejtori i Kompanisë Rajonale të Ujësjellësit “Hidrodrini”, z.Agron Tigani.

Kompania Rajonale e Ujësjellësit “Hidrodrini” e cila përkujdeset për furnizimin me ujë të pijshëm të rajonit të Pejës ku gravitojnë 5 komuna në vite ka bërë përpjekje duke investuar në rrjetin e ujësjellësit, por edhe të kanalizimeve për trajtimin e ujërave të zeza dhe në këtë mënyrë ka kontribuar për një jetë më cilësore të qytetarëve të këtyre rajoneve.

Agron Tigani- drejtor i kësaj kompanie në një intervistë ekskluzive për Radio Pejës, ka vlerësuar se edhe përkundër vështirësive që ka në këto ditë të nxehta, qytetarët e Komunës së Pejës me ca përjashtime të vogla kanë furnizim tërregullt me ujë të pijshëm.

Me qëllim që të parandalohet keqpërdorimi i ujit të pijshëm nga qytetarët e pandërgjegjshëm, Kompania “Hidrodrini” ka krijuar ekipet mobile të cilat së bashku me policinë po patrollojnë në tërë regjionin dhe po denoncojnë në organet e drejtësisë të gjithë ata që po bëjnë keqpërdorime, ka thënë Tigani.
Kyçjet ilegale, shpenzimi i pakontrolluar i ujit të pijshëm si dhe ujitja e oborreve dhe rrugëve e jo rrallë edhe të kopshteve në zonat rurale, ka bërë që këto ditë pa furnizim të rregullt me ujë të pijshëm të mbesin banorët e zonave kodrinore të qytetit të Pejës, por edhe ata të kateve të larta të disa banesave kolektive, ka thënë Agron Tigani.

Për t’u furnizuar me rregull me ujë të pijshëm padyshim që është i rëndësishëm edhe inkasimi i mjeteve, por edhe shlyerja e borxheve që qytetarët kanë ndaj Kompanisë së Ujësjellësit “Hidrodrini”.

Në fund vlen për të veçuar se Kompania “Hidrodrini” dhe drejtori i saj apelojnë tek konsumatorët që të kursejnë ujin e pijshëm ngase burimet nga të cilat furnizohen mund të bijnë gjatë pikut të verës, për çfarë më pas do të jenë të shtyer që të aplikojnë masat e reduktimit të cilat padyshim se do të reflektojnë në pakënaqësi të qytetarëve, por që janë të domosdoshme.