| Publikuar më: 2017-09-07 | Radio Peja | Shtype |

Mbrëmë në Galerinë e Arteve të qytetit të Pejës u bë hapja solemne e ekspozitës së quajtur “37 vite Profile Dardane” e piktorit eminent, Isa Alimusaj.

Piktori i njohur Kosovar Isa Alimusaj me prejardhje nga Strellci i Epërm i Komunës së Deçanit, mbrëmë (më 6 shtator 2017) hapi ekspozitën e tij të pavarur të quajtur “Profile Dardane” në galerinë e qytetit të Pejës. Në praninë e artdashësve kosovarë e të huaj dhe familjarëve e miqve të piktorit, hapjen e bëri Zymer Mulliqi, drejtor i Galerisë së Arteve të Pejës.
Ndërkaq piktori Alimusaj theksoi se këtë ekspozitë e ka paraqitur brenda dhe jashtë vendit për të treguar më shumë për lashtësinë e popullit tonë.

Kjo ekspozitë e cila u hap mbrëmë u mirëprit mjaft mirë nga të gjithë të pranishmit të cilët e vlerësuan lart punën e piktorit Alimusaj.
Përveç përshtypjeve pozitive që pati nga të pranishmit, vlen të theksohet se tematika Dardane u vlerësua lart edhe nga piktori dhe kritiku i artit Besim Aliu, i cili më herët pati theksuar se kjo temë solli diçka të re në artet tona pamore.

Për të gjithë artdashësit që nuk patën mundësi të ishin prezent në hapjen e kësaj ekspozite, kjo ekspozitë do të qëndrojë e hapur për një muaj- deri me datë 6 tetor 2017.

L.M.