| Publikuar më: 2017-08-23 | Radio Peja | Shtype |

Festivali Ndërkombëtar i Filmit të Animuar- Anibar që kishte filluar me datë 14 gusht është përmbyllur të dielën me ceremoninë përmbyllëse të ndarjes së shpërblimeve, pas një gare të shfaqjes së filmave, punëtorive, prezentimeve, takimeve me animatorë dhe producentë, programeve për fëmijë dhe aktiviteteve tjera.

Tema e edicionit të 8-të të Anibarit ka qenë “Ta rikthejmë qytetin” që ka pasur për qëllim që të vihen në jetë hapësirat e pashfrytëzuara prej kohësh dhe të bënte bashkë të gjithë të interesuarit në kulturë, film; të interesuarit për të takuar njerëz të njohur e profesionistë në animacion, filmografi, art, arkitekturë e shumë fusha të tjera.

Drejtori ekzekutiv i Festivalit Ndërkombëtar te Filmit të Animuar- Anibar, Vullnet Sanaja e cilëson këtë edicion si më të suksesshmin gjërë më tani, për faktin se ky edicion ka pasur interesimin më të madh për shkak të programit të larmishëm që është prezentuar dhe se arriti të mbledhë mysafirë nga Kosova e shumë shtete tjera të botës.

Gjatë këtij festivali në garën zyrtare të filmave kanë konkurruar 213 filma nga afro 90 vende të ndryshme të botës të cilat më pastaj janë vlerësuar nga juria që ishte e përbërë nga një grup i animatorëve vlerësues kritik, të kompletuar në fushën e animacionit, e të njohur për punën e tyre.

Juria kryesore ishte e përbërë nga: Aneta Ozorek, Georges Schwizgebel, Pedro Rivero, Gerta Xhelo dhe Tünde Vollenbroek të cilët kanë vlerësuar filmin më të mirë Ndërkombëtar, filmin më të mirë Ballkanik, filmin më të mirë Music Video
Ndërsa juria e studentëve e përbërë nga Andi Gola, Edvin Susuri , Jeta Dobranja dhe Lunik Berisha, qe ishte juri e bazuar në studentë Kosovar kanë vlerësuar filmin më të mirë studentor.

Këtë vit juria ka vendosur që filmat fitues të jenë filmi “Oh Mother” nga Polonia që ka marrë çmimin kryesor, filmi “The Red Turtle”, filmi “Nothing happens”, filmi “Pussy”, “Zapaska” si dhe “Wicked Girl” nga Turqia dhe Franca.

Suksesi i Festivalit Ndërkombëtar të Filmit të Animuar- Anibar përveç punës së stafit punues dhe vullnetarëve që kanë kontribuar në mbarëvajtjen e këtij festivali, i atribohet poashtu edhe sponsorëve të shumtë që kanë përkrahur këtë festival.