| Publikuar më: 2017-08-15 | Radio Peja | Shtype |

Mbrëmë në Sallën e Kinotetarit “Jusuf Gërvalla” në Pejë, filloi Edicioni i 8-të i Festivalit Ndërkombëtar të Filmit të Animuar “Anibar”, e ku merrnin pjesë musafirë të shumtë nga Peja, mbarë Kosova si dhe musafirë ndërkombëtarë, adhurues dhe krijues të këtij zhanri artistik.

Me temën për ta Rikthyer Qytetin, mbrëmë në Pejë filloi edicioni i 8-të i Festivalit Ndërkombëtar i Filmit të Animuar.
Gjatë kësaj jave, të gjithë do të bashkohen për të Rikthyer Qytetin - duke qenë kjo kauza kryesore e këtij festivali, ku do të vihen në jetë hapësirat e pashfrytëzuara publike prej kohësh.

Duke e rikthyer qytetin, “Anibari” synon të reflektojë një ndërgjegje më të mirë të shoqërisë në raport me hapësirat publike, ka thënë në hapjen e mbrëmshme të ketij festivali, drejtori ekzekutiv Vullnet Sanaja.

Gjatë kësaj jave, të gjithë të interesuarit në kulturë, film si dhe të interesuarit për të takuar njerëz të njohur e profesionist në animacion, filmografi, art, arkitekturë e shumë fusha të tjera, do të kenë mundësi të marrin pjesë në aktivitete të llojllojshme, duke filluar prej orës 10 të mëngjesit e deri në 10 të mbrëmjes.

Përpos filmave do të hapet edhe një ekspozitë në Galerinë e Arteve në Pejë, do të ketë punëtori për fëmijë dhe të rinj, takime e prezantime në ambiente të ndryshme dhe në fund të çdo dite do të ketë manifestime (afterparty) të cilat shënojnë fundin e secilës ditë të Festivalit.