| Publikuar më: 2017-07-20 | Radio Peja | Shtype |

Këto ditë me temperatura të larta, jo vetëm në qendrat e mjekësive familjare, por edhe në Spitalin Rajonal të Pejës hetohet një rritje e ndjeshme e fluksit të pacientëve të cilët kërkojnë ndihmë në këtë institucion rajonal të shëndetit.
Dr. Skender Dreshaj, drejtori i këtij spitali thotë se ashtu si viteve të mëparshme, edhe në këtë vit ekipet e këtij spitali me sukses po ia dalin që t’iu dalin në ndihmë qytetarëve, jo vetëm të Komunës së Pejës por edhe të rajonit.

Ashtu sikur edhe viteve të mëparshme, edhe këtë vit menaxhmenti i Spitalit Rajonal në Pejë ka bërë përgatitjet e duhura që të përballet me një fluks të shtuar të pacientëve në kohën kur temperaturat janë të larta, por edhe në këtë periudhë kur rritet fluksi i bashkatdhetarëve që vijnë në pushimet verore.
I lutur që për radion tonë të thotë një vlerësim për punën dhe angazhimin e stafit të këtij spitali, ngase jo rrallë në opinion është krijuar një përcepsion që shëndetësia nuk është në nivel të kërkesave të qytetarëve dhe se ndodh që jo rrallë të krijohet një përcepsion se këtu nuk punohet.

Dr. Skender Dreshaj, drejtori i këtij spitali thotë se ky përcepsion është i gabuar ngase ekipet e këtij spitali janë në nivel të detyrës edhe përkundër vështirësive me të cilat ballafaqohen.
Nëse brenda një viti kemi 3-4 mijë operacione, 3-4 mijë lindje të foshnajve pa asnjë rast mortaliteti as të nënave as femijëve, nëse brenda një tre mujori kemi 38 mijë vizita ku 98% e tyre trajtohen me sukses tek ne, nëse nje aparat i CT–së ka të programuara 500 mijë ndërkaq brenda vitit bën dyfishin, nëse të gjitha këto i kemi në konsiderim, atëherë përcepsioni është i gabuar.

Drejtori i Spitalit të Pejës, Dr. Dreshaj thotë se tani për tani kanë problem me klimatizimin e ambienteve spitalore për shkak të temperaturave të larta, por se ky projekt është shumë i shtrenjtë që të realizohet.

Ai më pas ka shtuar se kuadri i cili çdo ditë e më shumë po vie duke u moshuar, në një të ardhme shumë të shpejtë mund të bëhet problem për ofrimin e disa shërbimeve specialistike në këtë spital.