| Publikuar më: 2017-07-13 | Radio Peja | Shtype |

Me ardhjen e sezonës së verës dhe me shtimin e populates për shkak të ardhjes së bashkatdhetarëve, dita e ditës po shtohen edhe mbeturinat të cilat mund t’i hasësh në çdo cep të qytetit por edhe fshatërave. Kompania “Ambienti” në Pejë bën apel tek të gjithë qytetarët që të mos i hedhin mbeturinat vend e pa vend dhe të respektojnë orarin e grumbullimit të mbeturinave të përcaktuara nga kompania gjegjëse.

Nexhat Avdullahu drejtor i kompanisë “Ambienti” në Pejë thotë se edhe përkundër punës së pandërprerë të punëtorëve të kësaj kompanie prapë se prapë në një ambient të pastër ndikon edhe ndërgjegjësimi i qytetarëve andaj apelon tek ta që sidomos në këta muaj të nxehtë ta ruajnë ambientin pasi që një ambient i pastër do të thotë shëndet i mirë.

Nga ana tjetër një apel tjetër vie edhe nga Drejtoria e Parkut Kombëtar “Bjeshkët e Nemuna” e cila apelon tek të gjithë pushuesit dhe të gjithë ata që janë duke shfrytëzuar bukuritë natyrore të bjeshkëve të bukura të Parkut Kombëtar “Bjeshkët e Nemuna” të kenë kujdes maksimal dhe të mbroni mjedisin ku pushoni, ta merrni me vete bërllogun e krijuar si dhe të mosndezni zjarre.
Në rast të ndezjes së zjarrit, ta keni vëmendjen maksimale në ndaljen e tij para se të largoheni nga vendi i pushimit.