| Publikuar më: 2017-07-12 | Radio Peja | Shtype |

Këto ditë kur Kosova dhe Peja po përballen me temperature ekstreme të larta, qytetarët e Pejës të cilët po kanë problem me këto temperature për ndihmë po i drejtohen Spitalit Rajonal në Pejës, spital ky i cili deri më tani me sukses po ia del që të përballojë këtë fluks të rritjes së pacientëve, ka thënë Skender Dreshaj- drejtor i Spitalit Rajonal në Pejë.
Temperaturat shumë të larta që po mbretërojnë këto ditë në komunën tonë kanë rritur fluksin e qytetarëve në qendrat kryesore të mjekësisë familjare por edhe në Emergjencën e Spitalit Rajonal në Pejë, ku ata po kërkojnë ndihmën mjekësore. Në rritjen e fluksit të pacientëve në këtë spital, sipas drejtorit të këtij spitali Skender Dreshaj ka ndikuar edhe numri i rritur i bashkatdhetarëve që po vie për pushime në Kosovë.
Dr. Skender Dreshaj apelon tek qytetarët, në veçanti tek ata me sëmundje kronike që të mos i ekspozohen Diellit dhe të kenë kujdes me ushqimet që i përdorin.
Edhe pse nga nesër meteorologët kanë paralajmëruar rrënie për disa shkallë të temperaturave, megjithatë qytetarët duhet të jenë sa më të kujdesshëm që të respektojnë këshillat e mjekëve ngase kjo është në interesin e shëndetit të tyre.