| Publikuar më: 2017-06-16 | Radio Peja | Shtype |

Sot me nderimin e dëshmorëve dhe ngritjen e flamurit në sheshin qendror të Pejës dhe manifestime te tjera kulturore Peja shënoi 18 vjetorin e çlirimit të saj.

Me ngritjen e flamurit nga ana e Kryetarit të Komunës Gazmend Muhaxherit dhe aktivistit më të vjetër të kauzës kombëtare nga radhët e LDK-së Nezir Gashit, sot filluan manifestimet kushtuar 18 vjetorit të Ditës së çlirimit të Pejës.

Me këtë rast kryetari Muhaxheri duke folur për rëndësinë e madhe të kësaj date historike për qytetarët e Komunës së Pejes, mes tjerash vlerësoi se ishte rrugëtim i gjatë ndër shekuj i shqiptarëve e me këtë rast edhe i qytetarëve të Komunës të Pejës në rrugën e lirisë dhe pavarësisë.

Më pas për nder të kësaj date të çlirimit të Pejës në teatrin e qytetit “Istref Begolli”, në Pejë u bë promovimi i monografisë të qytetit të Pejës të hartuar nga një grup autorësh e në të cilin janë përfshirë të gjitha periudhat historike të këtij qyteti e deri në ditën e sotme. Lidhur me këtë foli prof. dr. Gazmend Riza, kryeredaktor i kolegjiumit të këtij botimit .
Njëherit edhe perfaqësuesit e subjekteve politike, ata nga radhët e AAK, PDK, VV dhe të tjerë sot vunë buqeta lulesh bënë homazhe tek busti i Shkëlzen Haradinajt dhe lapidarët e dëshmorëve të tjerë të lirisë së Pejës.

Ndërkaq sot në oren 13:00 në afërsi të stacionit të trenit u zbulua pllaka përkujtimore e Qerim Muriqit, i cili ra dëshmor me 18 mars 1998 në demonstratat gjithëpopullore kundër regjimit të Sllobodan Millosheviqit.

Aktivitetet kulturore për shënimin e 18 vjetorit së Ditës së Çlirimit do të përmbyllen me hapjen e Festivalit Nderkombëtar të monodramës “Monoakt”.